Laba ka mida guddoomiye ku xigeenada Gobolka Banaadir ayaa loo qaatay inay ka mid noqdaan saraakiisha Booliska Soomaaliyeed sida muujineyso qoraal ay heshay Wadani.com oo uu ku saxiixan yahay Taliyaha ciidamada Booliska Soomaaliyeed Jeneraal Maxamed Sheekh Xasan.
Qoraalka ayaa lagu caddeeyay in:
- Guddoomiye ku xigeenka Gobolka Banaadir ee dhinaca Maaliyadda Ismaaciil Macalin Cabdi
- iyo Guddoomiye ku xigeenka Gobolka Banaadir ee dhinaca siyaasadda Maxamed Axmed Diiriye
In loo qaatay Gaashaanleyaal ka tirsan ciidamada Booliska Soomaalayeed, iyadoo taliyaha Booliska Soomaaliyeed Gen. Maxamed Sheekh Xasan oo qoraalkiisa ku sheegay in xuquuq iyo waafajin saraakiisha ciidamada Booliska lagu daro labadan shaqsi oo ka mid noqonaya saraakiisha Booliska.
Taliyaha Booliska ayaa arrintan ku sababeeyay inay qeyb ka tahay fulinta xeer madaxweyne Lr. 7 oo ahaa in aqoonyahanada maamulka Gobolka Banaadir loo qaato saraakiil Booliska ah, Xeerkaas oo soo baxay Bartamihii Bishii Maarso 2016.
Labadan mas’uul ee ka tirsan guddoomiye ku xigeenada Gobolka Banaadir ayaa midkiiba si toos ah loogu qaatay inay yihiin Gaashaanleyaal ka tiran saraakiisha Booliska, iyagoo xilkooda gobolka Banaadir sii heysan doona.
Maxamed Axmed Diiriye ayaa ka baxay Jaamacad ku taala dalka Suudaan, halka Ismaaciil Macalin Cabdi isna ka qalin jebiyay jaamacad ku taalla Pakistan, Ma cadda qorshaha lagu qaatay labadan mas’uul iyo sababta markiiba Gaashaaleyaal looga dhigay, loogana xushay guddoomiye ku xigeenada kale ee Gobolka Banaadir.
Warar xogogaal ah ayaa sheegaya in labadan mas’uul loo wado arrimaha ammaanka gobolka Banaadir oo dhowaan lagu wareejiyo maamulka Gobolka Banaadir, waxaase wax lala yaabo ah in shaqsiyaad aan xitaa qaadan tababar ciidan oo hal bil ah laga dhigo saraakiil sare.
Go0bjooge.com
