Madaxweynayaasha saddexda maamul Goboleed ee Galmudug, K/Galbeed iyo Hirshabeelle ayaa shir lama filaan ku yeelanaya Magaalada Baydhaba xilli laga sugayey inay tagaan magaalada Muqdisho oo uu ku casuumay Madaxweynaha Soomaaliya Maxamed C/llaahi Farmaajo.
Shirkan ayaa la sheegay inuu qabanqaabinayo Madaxweynaha K/Galbeed C/casiis Xasan Maxamed (Lafta-garen), kadib markii uu usoo jeediyey Axmed Cabdi Kaariye (Qoorqoor), kadibna lagu qanciyey Maxamed Cabdi Waare, iyadoo ujeedku yahay inay muujiyaan sida ay u diidan yihiin shirka Muqdisho ee ay Madaxweyne Farmaajo Farmaajo ku qasbeen inuu qabsoomo madaxweynayaasha Puntland iyo Jubbalanad.
Xogta la helay ayaa sheegeysa in Madaxweyne Farmaajo uu si hoose u taageersan yahay shirkan, isla markaana doonayo inuu sii kala fogeeyo Shanta maamul Goboleed oo laba qeybood u kala jebiyo, si heshiis guud oo laga gaarayo Doorashada u sii jiitamo, sidaasina ku suuragasho muddo kororsi.
Madaxweynaha Galmudug ayaa ah ninka saldhigga u ah hinaase siyaasadeed iyo diidmada Muqidsho, isagoo ka careysan laba arrimood oo ku saabsan fursadda iyo soo dhoweynta weyn ee loo sameeyay madaxda Siciid C/llaahi Deni iyo Axmed Maxamed Islaam iyo diidmada ay labadan Nin diideen Shirkii Dhuusaaareeb.
Lafta-gareen iyo Qoorqoor ayaa marka ay la hadlayaan Beesha Caalamka si cad ugu sheegaya inay ka horjeedaan qorshaha Doorashada ee Madaxweyne Farmaajo, halka Madaxweyne Waare uu yahay midka kaliya ee sida buuxda u taageersan Farmaajo, laakiin waxay saddexdooda ka mideysan yihiin marka miiska wadahadalka la yimaado inaysan ka hor imaan karin Madaxweyne Farmaajo.
In la furfuro qodobadda shirkii Dhuusamareeb oo dib loo saxo iyagoo fadhiya waxay weji gabax ku tahay saddex madaxweyne ee ku shiraya Baydbaba, waxayna guul siyaasadeed siineynaa labadii madaxweyne ee diiday shirkii Dhuusmaareeb III, in shir dhex mara Farmaajo, Qoorqoor iyo Axmed Madoobe go’aano doorasho kasoo baxaan-na waxay waxba kama jiraan ka dhigeysaa shirka Dhuusamareeb, iyadoo miisaanka siyaasadda u weecineysaa madaxda hal beel.
Shirka Baydhaba uga furmaya saddexda Madaxweyne wuxuu u muuqdaa mid aan dhaafsiisneyn door ay Qoorqoor, Lafta-gareen iyo Waare raadinayaan kaalin ay hore u lumiyeen markii ay isu dhiibeen Madaxweyne Farmaajo, balse shirkooda ku dhammaan doono sida uu Farmaajo rabo ama ugu badnaan ay faragelin doonaan Beesha caalamka oo Mareynkanku ugu horeeyo.
