Kulano adag oo aan caadi ahayn ayaa magaalada Muqdisho uga socda madaxda dowladda Federaalka Soomaaliya iyo kuwa maamulada dalka, kadib markii Baarlamaanka Soomaaliya la marin waayay heshiiska Qaabka Doorashada ee ay gaareen.
Shirarkan oo si joogto ah u socdo isla markaana qaatay saacado badan oo habeen iyo maalin aan loo kala kicin ayaa la sheegay in arrinta ugu weyn ee hortaala ay tahay waxa laga yeelayo Gobolka Banaadir oo aan xubno ku lahayn Aqalka Sare ee Baarlamaanka, arrintan oo baarlamaanka intiisa badan ay diideen.
Guddoomiyaha Baarlamaanka Maxamed Sheekh Cusmaan (Jawaari) oo ka mida madaxda kulamada u socdaan ayaa cadaadis lagu saaray inuu hakiyo kulanka Baarlamaanka ee maanta, isagoo lagu eedeeyay inuu qeyb ka yahay dhibaatada ka taagan Baarlamaanka, laakiin Jawaari ayaa iska fogeeyay eedeyntaasi isagoo ku dooday inaanu afduubi karin xildhibaanada oo kaliya oo guddoomiyo.
Puntland ayaa noqotay maamulka kaliya ee diidan in Gobolka Banaadir xubno ku yeesho Aqalka sare, waxayna wararku sheegayaan in madaxweynaha Puntland C/weli Gaas uu ku dooday in sidiisa loo fuliyo heshiisyada Garowe iyo Muqdisho. Waxaa kaloo diidmada ku wehliya Axmed Madoobe oo dib uga soo biiray arritan.
Lama oga sababta Puntland u diidan tahay arrintan waxaase socda dadaallo lagu doonayo in lagu qanciyo wafdiga Puntland oo hore u diiday heshiiskii Madasha kadibna dib ka ogolaaday.
Wadani.com
