Mugdi ayaa hareeyey kiiska Gabar 23 sano jir ah oo lagu magacaabo Ikraan Tahliil Faarax, kadib markii la waayey 26-kii June 2021, xilli ay ku danbeysay Gaari la sheegay inay ku qaadeen xubno ka tirsan Hay’ada Sirdoonka Soomaaliya ee NISA.
Ikraan noqotay Agaasimaha Xafiiska Duqqa Magaalada Muqdsho, xilligii Allaha u naxariistee Engineer Cabiraxmaan Cusmar Cusmaan (Yariisow) ayaa sida xogta lagu helay u shaqeyneysay NISA, kana mid ahayd haweenka Sirdoonka, iyadoo xilliga shaqada loo qoray aanay caddeyn, Wararkuna sheegayaan in xilliga ay la shaqeyneysay Guddoomiye Yariisow ay ka mid ahayd Hay’adda.
Taliyihii hore ee NISA C/llaahi Maxamed Cali (Sanbaloolshe) ayaa sheegay in kiiska Ikraan uu mugdi badan ku hareereysan yahay, balse wuxuu xaqiijiyey inuu isagu shaqada u qoray sanadkii 2017, ayna ka mid ahayd xubnaha la shaqeeya, kadibna uu u wareejiyey Qeybta xuquuqda Insaanka kale.
“Ikraan Tahliil waxay kusoo biirtay Hay’adda 2017, aniga ayaana qoray.., Kiiskeeda mugdi badan ayaa ku hareysan. laakiin haddii aan kor iyo hoos ka eegay Waddo qaloocan iyo waddo toosan oo la xiriirta kiiska gabashan wuxuu ku arooreyaa Hey’adda NISA, Meesha ay deganeyd waxay u dhoweyd Hay’adda NISA xarunteeda, saraakiisha hay’adda ayeyna ka mid ahayd” ayuu yiri Sanbaloolshe.
“Dowladda ayaa la rabaa inay gabadhan nolol iyo geeri ku sheegto.. waxaa jira tuhun fara badan oo in Kiiskan Hey’adda Nabadsugida ku lug leeyihiin iyo dareen xooggan ah. Arrimo xasaasi ama xog xasaasi ah, waxaa laga yaabaa wax ay ogtahay inay dhibanne u tahay.. Database ciidamada Eritrea loo qaaday ayey heysay.. Waxaas oo dhan baaritaannada ayey kasoo bixi doontaa..” ayuu yiri Sanbaloolshe oo farta ku fiiqay Hay’adda NISA.
Agaasime ku xigenekii hore ee NISA C/salaan Axmed Guuleed ayaa isna sheegay in shakiga la qabo uu yahay inay gabadhan ku maqan tahay gacanta dowladda, taasina ay muujineyso in dowladda ay u shaqeyneysay aysan ka maqneyn oo wax dadaal ah uigu jirin.
Wuxuu sheegay inay Ikraan heysay xogta askarta sida qarsoodiga ah ee Fahad iyo Farmaajo u direen dalka Eritrea, ayna arrintan u muuqato in dowladda ku talagashay in ay tirtirto raadka iyo xogta ay heysay gabadhaasi.
Kiiska Ikraan Tahliil Faarax ayaa sidoo kale dadka qaarkiis tilmaamayaan inay xog ka heysay weerarkii lagu dilay gudoomiyihii hore ee G/Banaadir C/raxmaan Yariisow oo ay ka hoos shaqeyneysay, iyadoo ka tirsan NISA.
Hoos ka dhageyso Warbixin ay VOA ka diyaarisay
