Xubin ka tirsan Guddiga Doorashada Heer Federaal ayaa ka badbaaday weerar Qarax Miino loo adeegsaday oo lala beegsaday duleedka magaalada Jowhar.
Mahad Cumar Cabdi oo ka tirsan xubnaha guddiga doorashooyinka heer Federaal ee FIET u metela Maamulka Hirshabelle ayaa ka badbaaday qaraxa xilli uu ku soo jeeday magaalada Muqdisho, isagoo Gaari uu la socday mareyay agagaarka Garoonka Diyaaradaha magaalada Jowhar.
Mas’uulkan Qaraxa lagu weerarray ayaa ah wakiilka guddiga FIET ee Hirshabeelle, waxuuna ka mid yahay xubnaha ku dhow ee la shaqeeya Guddoomiyaha guddiga Muuse Geelle.
Qaraxa aya haleelay Gaariga uu la socday, iyadoo ay ku dhinteen laba askari oo ilaalo ahaan ula socday. Waxaa kaloo qaraxa ka badbaaday xubno kale oo la socday Gaariga oo ay ka mid ahaayeen Bakiin Maaxi Macalin, Xildhibaan Cabdullahi Cadde, iyo gudoomiyaha degmada Warshewkh.
Guddoomiye ku xigeenka guddiga doorashooyinka heer federaal ee FEIT Mowliid Mataan ayaa sheegay in qaraxii uu saakey ka badbaaday Mahad Omar Abdi oo guddiga ka tirsan uu yahay isku daygii labaad ee lagu khaarijin rabay xubnaha guddiga.
