Waxaa xalay dalka Sudan looga dhawaaqay xukuumad cusub oo dalkaasi yeelanayo, kadib kacdoonkii xukunka looga tuuray madaxweynihii hore ee dalkaasi Cumar Albashiir.
Ra’iisul wasaaraha cusub ee Suudaan, Cabdalla Xamduuk oo ah aqoonyahan caan ah oo xilkaasi loogu dhiibay inuusan kooxna ka tirsaneyn ayaa shaaciyey magacyada Golaha wasiirada cusub oo ka mida dowladda KMG aha ee saddex sanno dalkaasi maamuli doonto.
Wasiirka arrimaha dibaddda Suudaan ayaa loo magacaabay Asmaa Mohamed Abdallah, waana markii ugu horeysay taariikhda dalkaasi oo haweeneey ay noqoto wasiirka arrimaha dibadda Suudaan. Asmaa ayaa hore u soo noqotay safiirka Suudaan u fadhiyey dalalka Norway, Sweden iyo Marooko, waxaana shaqada diblomaasiyadda ka saaray madaxweynihii hore, iyadoo markaas kadib qoyskeeda kula nooleyd dalka Marooko.
Golaha wasiirada cusub ee la magacaabay oo ah 18 xubnood ayaa waxaa ka mida afar haween ah, waxaana harsan laba wasiir oo dib laga soo magacaabi doono. Ciidamada dalkaasi ayaa loo dhiibay xilalka Arrimaha Gudaha iyo Gaashaandhigga, waxaana Jamaal Cumar oo janaraal ka tirsan ciidammada loo magacaabay wasiirka gaashaandhigga; halka El-Trafi Dafallah oo horey u ahaa sarkaal sare oo ka tirsan booliska uu noqday wasiirka arrimaha gudaha.
