Xafiiska Ra’iisal wasaaraha Soomaaliya ayaa shaaciyey qorshe ay diyaarisay Wasaaradda Arrimaha Gudaha, Federaalka iyo Dib-u-heshiisiinta oo looga hadlay shirka Guddi hoosaadka Golaha Wasiirrada ee qaabilsan waxa loogu yeero ‘Tubta Siyaasadda Loo dhan yahay’.
Qorshahan ayaa la sheegay inay maanta kusoo badhigtay Wasaaradda, isagoo faahfaahsan oo ku saabsan sidii loo wajihi lahaa wada xaajoodka Dowlad Goboleedyada iyo Dowladda Federaalka ee arrimaha doorashooyinka, kadib markii Ra’iisul Wasaare Kheyre uu xukuumadda faray inay dardar geliso arrimaha doorshooyinka.
Qorshahaan ayaa la filayaa in loo gudbiyo Golaha wasiirrada oo fadhiyadooda uga doodi doona, si uu dhaqan gal u noqdo loona billaabo in lagu howlgalo.
Waxaa shirka maanta guddoomiyey Ra’iisul Wasaare ku-xigeenka dalka mudane Mahdi Maxamed Guulee, waxaa kaloo looga hadlay hab-raaca dhameystirka wada xaajoodyada muhiimka awood-qaybsiga siyaasadeed iyo dhaqaale ee DF iyo dowlad gobaleedyada iyo iskaashiga heerarka dowladda ee Qabashada doorashooyinka 2020-2021.
Arrintan ayaa imaaneysa iyadoo uu dhowaan fashilmay shir ay yeesheen wakiilo ka kala socday Madaxtooyada Soomaaliya iyo Maamul Goboleedaya oo looga hadlay sidii madaxda sare u kulmi lahaayeen.
