Tan iyo markii uu soo if baxay khilaafka u dhaxeeya madaxweynaha iyo ra’iisal wasaaraha dowlada federaalka Soomaaliya waxaa markale si cad dadku ogaadeen in wasiirkii hore ee Garsoorka Faarax Sheekh C/qaadir uu yahay shaqsi ku dhex koray dowladnimada Soomaaliya oo miisaankiisu ka weynaaday intii caadiga ahayd ee wasiirnimo.
Waxaa ninkani uu yahay shaqsiga ugu dhow madaxweyne Xasan iyo saaxiib aan la loodin karin oo kalsoonida u dhaxeya ay gaartay heer dadka qaarkii aaminaan in qofka dalka xukuma ficil ahaan aanu ahayn Xasan Sheekh Maxamuud ee talada ugu danbeysaa ay ka go’do Faarax. Laakiin si kastoo wasiirkani loo dhaliilo waxaa in qirto u baahan aqoontiisa iyo dadaalkiisa dheeraadka ah ee ka dhex muuqda xukuumad kasta inta uu madaxweynaha yahay Xasan Sheekh.
Wuxuu hormuud u ahaa heshiiskii Itoobiya ku dhex maray Axmed Madoobe iyo dowladda, wuxuu kaloo farsameeyay kuna guuleystay inuu rido xukuumadii Saacid ee uu ka midka ahaa, isagoo si weyn ugu dhowaaday xukuumadda Itoobiya, iyo Kenya oo uu dalkeeda deganaa in muddo ah. Wasiir Faarax wuxuu doortaa wasaarado aan indhuhu durba qaban karin, sida saaxiibkii C/kariin Guuleed oo xilkiisa ku waayay markii wasaarad miineysan xilkeeda qabtay.
Khilaafka hadda ka dhaxeeya madaxweynaha iyo Ra’iisal wasaaraha wuxuu salka ku hayaa isla wasiir Faarax oo xilka laga qaaday, haddiiba ay dhacdo in laga noqdo waxaa muuqata inay u kala dhammaatay oo aan wadashaqeyn danbe yeelan karin madaxweynaha iyo ra’iisal wasaaraha. Haddana sidee dowladani ku badbaadi kartaa oo khilaafkan looga gudbi karaa?
Waxaa inuusan jirin xal sahlan oo khilaafkani ku dhammaan karo, xitaa haddii midkooda labada nin ee is haya Faarax iyo C/weli is casilaan, hadiise laga fiiriyo labada dhinacba qofkii taga dhibaato iyo dhaawac aanay kasoo waaqsan ayuu gaarsiin doonaa dowladda oo dhan. Haddii Faarax tanaasulo macnaheedu maaha inuu iska tegayo oo wuxuu mari doonaa jidkii C/kariin oo haddaba madaxweynaha lataliye u ah go’aan kastana qeyb ka ah.
Haddii loo faataxeeyo ra’iisal wasaare C/weli waxaa iyana aan marna samri karin xildhibaano iyo wasiiro badan oo qaati ka taagan Madaxweyne Xasan Sheekh ayna ka go’an tahay inay ka hor yimaadaan wax waliba oo dhinaciisa ka yimaada.
FAALADDA GOOBJOOGE.COM
