Wasiirkii hore ee Arrimaha dibadda Yuusuf Garaad Cumar ayaa difaacay inuu guddoomiye ka noqdo Guddiga qabanqaabada xafladda Caleemo-saarka Madaxweynaha Galmudug Axmed Cabdi Kaariye (Qoorqoor).
Madaxweyne Qoorqoor ayaa xalay magacabaay Guddiga qabanqaabinaya xafladda lagu caleemo saarayo isaga iyo ku-xigeenkiisa, kaasoo ka kooban 12 xubnood, wuxuuna guddoomiye uga dhigay Yuusuf Garaad, isagoo aan xubnaha Guddiga u dhaafin inay guddoomiye iska dhex doortaan.
Dad badan ayaa Yuusuf Garaad ku dhaliilay inuu Guddigaas ka mid noqdo iyadoo la og yahay sida maamulka cusub ee Galmudug lagu dhisay, laakiin Yuusuf Garaad ayaa jawaab ka kooban saddex qeybood ka bixiyey sida uu ku aqbalay Guddigan.
“Aniga oo xeerinaya baahida ay Soomaaliya u qabto in ay siyaasaddu xasisho, oo fursad kasta oo suurta gal ah looga faa’iideysto in siyaasiyiinta dhexdooda iyo shacabka iyo siyaasiyiintuba ay is fahmaan isuna soo dhowaadaan, isla markaana tixgelinaya soo jeedinta Madaxweynaha Galmudug oo inkasta oo aan mar ka wada tirsaneyn Xukuumadda aynaan mar kasta isku ra’yi ahayn, ogna in uu og yahay in aan taageeray murashax kale, waxaan aqblay howsha uu ii xilsaaray oo ah qabanqaabada munaasabadda caleema saarka taas oo aan u arko howl Qaran oo aan u qabanayo dalkeyga…” ayuu yiri Yuusuf Garaad
Wuxuu Madaxweynaha Galmudug uga mahadceliyey inuu iskiis ugu gartay in howshaas muhiimka ah uu u qabto GalMudug, sida uu yiri. “Waxaan u arkaa qaddarin gaar ah in aan Guddoomiye ku Xigeenka iyo xubnaha kale ee sharafta badan kala shaqeeyo Caleemo saar dadweynaha Soomaaliyeed ee Galmudug rajo geliya, hadba inta ay taagtu tahay, billow rasmi ahna u noqdo dib u heshiin uu ifafaalaheedu muuqdo.”
Dhinaca kale wuxuu dadka arrintan ka hor yimid ku yiri: “Waxaan leeyahay adinka oo aad ugu mahadsan qaddarinta aad ii heysaan, ogaada anigu Xil kama qaban Galmudug. Ma ihi mana rabo in aan noqdo nin iskala weyn in uu dadkiisa iyo dalkiisa u adeego”
