Wasiirkii hore ee arrimaha dibadda Soomaaliya Yuusuf Garaad Cumar ayaa bogaadiyey tallaabada uu qaaday madaxweynaha Soomaaliya Maxamed C/llaahi Farmaajo ee isu soo dhoweynta dalalka Jabuuti iyo Eritrea.
Yuusuf Garaad oo ka mida wasiirada xilalkooda ku waayey isku shaandheyn uu sameeyay Ra’iisal wasaare Xasan Cali Kheyre ayaa qoraal uu dhigay baraha bulshada ku taageeray doorka ay madaxweyne Farmajo iyo wasiirka arrimaha diabdda Axmed Ciise Cawad ka qaateen arrimaha Geeska Afrika.
“Tallaabooyinka uu Madaxweynaha Soomaaliya qaaday, Wasiirka Arrimaha Dibadduna uu ku wehliyo ee ku wajahan isu soo dhowaashaha iyo wax wadaqabsiga shucuubta Geeska Afrika Djibouti, Eritrea, Ethiopia iyo Somalia waxay mudan yihiin bogaadin iyo in lagu garab istaago…” ayuu qoraalka ku yiri Yuusuf Garaad.
Wuxuu intaas ku datay in Geeska Afrika ay ragaadisay colaado iyo abaaro. Isu soo dhowaashahan curdanka ahina uu horseedi karo in laga gudbo siyaasadihii cakirnaa ee Gobolka la haray.
