Senator Cabdi Xasan Cawaale (Qeybdiid) iyo Senator Muuse Suudi Yalaxow ayaa su’aalo weydiiyey Madaxweynaha Puntland Siciid C/llaahi Deni oo maanta tegay xarunta Aqalka Sare ee Magaalada Muqdisho.
Labada Senator ayaa faahfaahi ka bixiyey sida madaxweyne Farmaajo u magacaabi la’ yahay Ra’iisal wasaaraha cusub oo Beesha Hawiye ay leedahay, waxayna Siciid Deni weydiiyeen inay heshiis la gaarayaan Madaxweyne Farmaajo iyadoo aanu magacaabin Ra’iisal wasaare.
Senator Muuse Suudi ayaa si qayaxan u sheegay in Madaxweyne Farmaajo uusan xal ka rabin dalkaan, uuna tuhunsan yahay inuu dalka ka socdo heshiis aanay beesha Hawiye qeyb ka ahayn, isagoo soo jeediyey in doorashada lasoo dedejiyo ama aan heshiis la gelin iyadoo aysan xukuumad la dhisin.
Madaxweynaha Deni ayaa sheegay inuu isagu qabay in marka hore la dhiso xukuumadda, isla markaana aanu is lahayn in xukuumadii oo aan dhisneyn la tegayo shirkii Dhuusamareeb 15-ka Ogost, isagoo waqti ku bixiyey arrintan, balse uu arka inuu keligiis ku yahay arrintan, sidaasina ay la noqotay in Beeshii lahayd aysan rabin.
“Markii danbe waxaan u muuqanay in Puntland keligeed inay ka hadleyso arrintan.. rag saaxiibadeen ah oo is aragnay waxay nagu yiraahdeen: “Adinka kaliya maxaa idinka qeyblisiinaya, maad caadi iska dhigtid.?” markaas Reerkii lahaaba haddii aanay raadineyn.. waxaan is iri malaha maba rabaane ka gudub…” ayuu yiri Madaxweynaha Puntland oo si culus uga jawaabay labada senator uguna baaqay in codkooda si weyn loo maqlo.
