DHACDO KA MID AH GURMAD QARAN: ‘Markii qaraxu dhacay Ra’iisal wasaaraha Sooomaaliya Xasan Cali Khayre ayaa dhowr dowladood la hadlay, una sheegay in gurmad ay u baahan yihiin dadkii ku waxyeeloobay, gaar ahaan mid caafimaad.
Maalintii ku xigtay dowladda Turkiga ayaa soo jawaabtay, gelinkii dambe ee maalintaas ayaan ogaannay in Turkigu ay maalinta xigta dhaawacyada daran u qaadayaan dalkooda si loo soo daweeyo.
Dhaawacyadu dhowr Isbitaal ayay ku jireen, Laakin dowladaha dhaawacyada u qaadaya dibadda waxa ay sheegeen in bukaan kasta la soo raaciyo warbixintiisa caafimaad oo ay qorayaan Isbitaal Madiina ama Odogan (Digfeer). Waxaan ku qasbanayn in aan dhaawacyada ugu tagno isbitaallada kale, soo qaadno oo aan keenno Madiina ama Ordogan, marka warbixintiisa la diyaariyo si loo soo qaado.
Waxaa nala socday, oo isbitaal kasta nala tagayay Agaasimaha Hay’adda Socdaalka iyo Jinsiyadda Kornayl Koofi iyo howl-wadeennadiisa oo bukaan kasta isla markiiba u sammaynayay Dokoment safar (Travel Document) deg deg ah.
Dhacdadii iigu yaabka badnayd waxa ay dhacday markii aan Isbitaalka Daaru-Shifa ugu tagnay wiil labada daan ka burburay, dhaawacyo kalena madaxa ka qaba oo uu aabihiis la joogo, wiilkaasi waxa uu ka yaraa 15 sano. Waxa aan u soo bandhignay aabihii in la qaadayo wiilkiisa oo adeeg caafimaad Turkey loogu fidinayo, isaguna uu raacayo.
Odaygii waa uu diiday arrintaas!, waxa uu noo sheegay in wiilkiisa uu Qur’aan saaranayo, daawada isbitaalka uu joogana ay ku filan tahay. Waa habeenkii 3pm kaddib, aad ayaan u barinnay annaga oo dhowr wasiir iyo xubnaha guddiga gurmadkaba isugu jirna, waa uu naga diiday.
Bannaanka ayaan uga baxnay qolkii bukaanku jiifay, waxa aan ku tashannay in aan xoog ku wadno wiilka bukaanka ah iyo aabbihii ba, maxaa yeelay wiilku gargaar degdeg ah ayuu u baahnaa.
Wasiirka Caafimaadka Fowsiyo Abiikar Nuur ayaa naga codsatay in ay mar kale odayga ku laabato oo fursad la siiyo, kaligeed ayaa qolkii ku noqotay, Jilbaha ayay dhulka dhigatay, waxa ay garka iyo jilbahaba qabsatay Odaygii, ayada oo ilmaynaysa ayay ka bariday in wiilkiisa oo la badbaadin karo loogu qaado caafimaad, waliba uu raaco. Waxa ay u sheegtay in qofka ugu horreeya ee dhibka wiilkani uu damqinayo uu isaga yahay, sidoo kalena haddii la daaweeyo uu wiilkiisii yahay, waa uu aqbalay odaygii baryadaas, wiilki iyo isagaba waxaa loo sammeeyay dokominti safar, waana la qaaday’ sidaa waxaan ka soo wariyay Wasiir ku xigeenka Arrimaha Dibadda Soomaaliya Mukhtaar Daa’uud.
W/Q: Yuusuf Sh. Ciise
