Dowladaha Soomaaliya iyo Jabuuti ayaa kala saxiixday heshiisyo kala duwan oo ka mid yahay heshiis ku saabsan dhinaca iskaashiga Amniga labada dal.
Wasiirka Wasaaradda Arrimaha Dibadda Soomaaliya Axmed Ciise Cawad iyo wafdi uu hoggaaminayo oo muddo laba cisho ah booqasho ku joogay dalka Jabuuti ayaa magaalada Jabuuti kula kulmay madaxda dowladda Jabuuti oo ay isla soo qaadeen xiriirka labada dal.
Wasiirku waxa uu la kulmay Wasiirka Arrimaha Dibadda Jabuuti Mudane Maxamuud Cali Yuusuf oo ay ka wada hadleen xoojinta xiriirka iyo iskaashiga ballaaran ee laba dal iyo labada shacab ee walaalaha ah u dhexeeya. Labada Wasiir ayaa kala saxiixay heshiisyo seddex ah oo uu ku jiro mid ku qotoma iskaashiga ammaanka.
Intii mudada ay booqashada ku joogeen dalka Jabuuti, Waxaa Wasiirka Wasaaradda Arrimaha Dibadda oo ay ku wehliyeen socdaalkiisa Xildhibaanno ka tirsan Golaha Shacabka iyo Siihayaha xilka Agaasimaha Waaxda Afrika ee Wasaaradda Mudane Khaliif Cali Xaashi Cilmi ayaa waxa ay booqasho sharafeed ugu tageen Madaxweynaha Jamhuuriyadda Jabuuti Mudane, Ismaaciil Cumar Geelle, waxa ay sidoo booqdeen xarunta Golaha Baarlamaanka iyo Machadka Diblomaasiyadda dalkaasi.
