Ciidamada Booliska magaalada Gaalkacyo ee gobalka Mudug ayaa gacanta ku dhigay Nin gacan-ku-dhiigle ahaa oo Muqdisho ku laayey dad shacab ah oo agara 5 qof.
Eedeysane Aweys Cismaan Cabdi oo toddobaadkii hore Degaanka Garasbaaley ee magaalada Muqdisho ku dilay shan Qof oo isku qoys ah ayaa lagu qabtay Koonfurta magaalada Gaalkacyo, sida uu sheegay Taliyaha Booliiska Gobalka Mudug G/Dhexe Qaasim Shirdoon Cal, waxaaa ninkan oo lagu daba jiray la ogaaday inuu xalay 10-kii fiidnimo tegay magaalada Gaalkacyo isagoo baxsad ah, kadibna ay saaka aroortii qabteen denbiilaha.
Dhinaca kale Taliya ku xigeenka ciidamada Booliska Soomaaliyeed Zakiya. Xuseen ayaa xaqiijisay in la qabtay eedeysanahan, waxayna qoraal ay soo dirtay ku tiri: ” Ciidanka Boliiska gobolka Mudug ayaa ku guuleystay inay gacanta ku soo dhigaan eedeysane Aweys Cismaan Cabdi oo dil wadareed ka geystay degaanka Garasbaaley ee Gobolka Banadir asigoo markii hore goobta ka fakaday balse lagu guuleeystay in lagu qabto magaalada Galkacyo.. Eedeysane Aweys waxaa loo haystaa dilka shan qof ay ku jirto xaaskiisa hore iyo ehelkeeda waxaana dhawaan la horkeeni doonaa sharciga.”
Gudoomiyaha gobalka Mudug Cabdiraxmaan Cali Diiriye oo goobta ka hadlay ayaa bogaadiyay howlaha shaqo ee Ciidanka booliiska gobalka Mudug ay u hayaan bulshada isagoo ugu baaqay Shacabku inay la Shaqeeyaan laamaha amniga si loo helo amni laysku haleyn karo.
