Isbaheysiyada xisbiyada Mucaaradka ee kala ah Madasha Xisbiyada Qaran ee ay hoggaamiyaan Madaxweynayaashii hore ee Somalia, Xisbiga Wadajir ee uu hoggaamiyo C/raxmaan C/shakuur, Isbabeysiga Xisbiyada Hiigsi iyo isbaheysiga isbeddel doonka 1-da Luulyo ayaa War culus kasoo saaray ciidamada Itoobiya ee ku sugan Soomaaliya ee aan ka mid ahayn AMISOM.
Qoraal wadajir ah oo ay Isbaheysiyadan u direen labada Aqal ee Baarlamaanka iyo Midowga Afrika, lana ogeysiiyey Golaha Amniga Q/Midoobay, UNSOM, Mareykanka, UK, Midowga Yurub, ururka Dalalka Islaamka, iyo dalalka ciidamada ka joogaan Soomaaliya ayaa lagu cambaareeyay ciidamada Itoobiya ka jooga Soomaaliya ee aan ka tirsaneyn AMISOM, kuwaasoo lagu tilmaamay ciidamo xoog ku heysta dalka oo sharci darro ah.
Waxaa lagu sheegay qoraalka in joogitaanka ciidamada Itoobiya ee gudaha Soomaaliya uu halis ku yahay qaranimada Soomaaliya, isla markaana ay faragelin ku sameeyaan arrimaha gudaha ee dalka, iyagoo loo adeegsaday doorashooyinka maamul Goboleedyada qaarkood, waxayna ku baaqeen in baaritaan lagu sameeyo ciidamadaasi.
Waxay Isbaheysiyada xisbiyada mucaaradka dalka si weyn u cambaareeyeen diyaaradii ay ciidamada Itoobiya kusoo rideen magaalada Berdaale, waxayna labada Aqal ee Baarlamaanka Federaala ugu baaqeen ina baaritaan ku sameeyaan ciidamada Itoobiya ee jooga Soomaaliya.
Waxaa qoraalka lagu cambaareeyay Wakiilka Midowga Afrika ee Somalia Franseicso Madeira oo lagu eedeeyay inuu ku fashilmau waxna ka qaban waayey tacadiyada ay geysanayaan ciidamada Itoobiya, waxaana golaha Amniga ee Midowga Afrika loogu baaqay inay dib u eegaan faragelinta ciidamada Itoobiya ku hayaan Soomaaliya oo sumcad darro ku ah howgalka AMISOM.
