Madaxtooyada Kenya ayaa shaacisay in Soomaaliya ay ku xadgudubtay xuduudka dalkooda iyo madax Bannaanideeda, kadib markii Isniintii 2-da Bishan ay ciidamada Somalia gudaha u galeen Magaalada Mandhera ayna waxyeelo u geysteen muwaadiniin Kenya.
Qoraalka Madaxtooyada Kenya oo ay ku saxiixneyd afhayeenka Madaxtooyada Kenya Kanze Dena-Mararo ayaa lagu sheegtay in maanta oo Arbaco ah 4-ta March 2020, uu dhacay kulan gaar ah oo ay isugu yimaadeen Golaha Amniga Qaran ee Kenya, kaasoo uu guddoomiyey madaxweyne Uhuru Kenyatta, loogana hadlay Warkii 5-tii bishii February soo saartay dowladda Soomaaliya; Eedeymo uu Kenya u jeediyay safiirka Soomaaliya ee Mareykanka Abuukar Daahir Cusmaan, xilli uu ku sugnaa magaalada New York, 27-kii bishii February, 2020-ka; Iyo weerar aan oggolaansho loo heysanin oo ay Dowladda Federaalka ku qaadday dhulka iyo madax bannaanida Kenya, taariikhdu markii ay ahayd 2-dii bishan March 2020-ka.
“Golaha Amniga Qaranka wuxuu muujiyay walaac ku aaddan xadgudubka ay ciidamada Xoogga Dalka Soomaaliya 2-dii bishan March 2020 u geysteen dhulka iyo madaxbannaanida Kenya; halkaasoo ciidamada -Soomaalida- ajnabiga ah ay ku sameeyeen falal ka dhan ah shuruucda caalamiga ah iyo heshiisyada kasoo horjeeda gardarrada iyo ficillada kale ee caddaawadda ah, iyagoo dhibaateeyay hantina ka burburiyay muwaadiniin reer Kenya ah oo ku nool magaalada xadka ku taalla ee Mandheera”, ayaa lagu yiri war-saxaafadeedka Madaxtooyada Kenya kasoo baxay ee lagu faafiyey Boogga Madaxtooyada Kenya ee Uhuru Kenyatta.
Kenya ayaa sheegtay in aysan wax jawaab ah ka bixinin ficilladaas ay ku eedeysay dowladda Soomaaliya, taas baddalkeedana ay is xakameysay iyadoo eegeysa xiriirka soo jireenka ah ee dhaqanka iyo nabad ilaalinta ee u dhaxeeya labada dal.
War -saxaafadeedka Madaxtooyada Kenya ayaa sidoo kale lagu soo daray warkii jawaabta ahaa ee dhowaan kasoo baxay Wasaaradda Arrimaha dibadda Kenya oo loogu jawaabay eedeymihii ay dowladda Soomaaliya u jeedisay Kenya oo ahaa in dowladda Kenya si joogto ah u waddo xadgudub ka dhan ah madaxbannaanida Soomaaliya.
