Madaxweynaha Soomaaliya Maxamed C/llaahi Farmaajo ayaa sheegay inay khadka Telefoonka wadahadal ku yeesheen Ra’iisal wasaaraha Itoobiya.
Qoraal uu soo dhigay bartiisa shaqsiga ah ee Twitter-ka ayuu ku sheegay inay isaga iyo walaalkii Abiy Ahmed ka wadahadleen sidii ay isaga kaashan lahaayeen ka hortagga cudurka Covdi-19.
“Walaalkey Ra’iisal wasaaraha Itoobiya Abiy Ahmed iyo Aniga waxaan khadka Telefoonka uga wadahadalnay sidii aan isaga kaashan lahayn, uguna midoobi lahayn dagaalka lagula jiro Covid-19 iyo sidaan u difaaci lahayn nolosha dadkeena. Wadajir ayaan uga guuleysan karaa dhibaatada..” ayuu qoraalkiisa ku yiri Madaxweyne Farmaajo
Waa markii labaad ee labada mas’uul ay khadka Telefoonka uga hadlaan xaaladda Coronavirus, iyadoo dhowaan madaxda IGAD ay shir ku yeesheen khadka Internet-ka.
Dhinaca kale Ra’iisal wasaaraha Itoobiya Abiy Ahmed ayaa sheegay inuu aad u soo dhoweynayo sida Madaxweynaha Turkiga u doonayo inuu Itoobiya ka taageero qalabka caafimaadka ee ka hortagga cudurka Covid-19, kadib markii ay Telefoonka ku wadahadleen, isagoo intaas ku daray inay sugayaan deeqda Turkiga.
