Golaha Magaalada Minneapolis ee gobolka Minnesota, dalka Mareykanka ayaa magdhow gaaraya 27 Million oo doolar siiyay qoyska ninkii madoobaa ee George Flyod oo Boolisku dileen bishii June 2020.
Lacagtan ayaa qaarkeed lagu kaalmeyn doonaa xaafadii uu Ninkan lagu dilay markii askari caddaan ah oo Neefta ku celiyey, isagoo jilibkiisa qoorta ka saaray, waxaana arrintan ka dhashay bannaanbaxo waaweyn oo Mareykanka iyo dunida qabsaday.
Muuqaal kooban oo laga duubay falka lagu dilay George Fyod oo ahaa 46 sano jir ayaa muujinaya wixi dhexmaray isaga iyo Booliska Minneapolis ilaa u dhintay markii ay neefta ku xirantay oo ereyadiisii ugu danbeeyay ay ahaayeen “MA NEEFSAN KARO”.
Qoyska Floyd ayaa sheegay in hadddii uusan ahayn muuqaalka laga duubay markii Askariga luqunta jilibka kaga hayay ay adkaan lahayd in caddaad la helo. Golaha Magaalada Minneapolis ayaa si aqlabiyad leh ugu codeeyay ansixinta lacagta magdhawga ah kahor dhageysiga dacwadda ee dhammaadka bishaan Maarso, waa lacagtii ugu badnayd ee abid lagu bixiyo gobolka Minnesota.
Arrinta dhalisay in Booliska ay gacanta ula tagaan ninka Madow ee George Floyd ayaa ahayd markii dukaan lagu magaacbo Cap Foods uu ka iibsaday sigaar, kadibna shaqaalihi dukaanka ka shaqeynayey ayaa booliska ugu yereen una sheegay inuu Floyd uu siiyey 20 doolar oo faalso ah.
Mulkiilaha dukaanka Mick Abumayeleh wuxuu TV-ga NBC ee Mareykanka u sheegay inuu dukaankiisa macamiil u ahaa, uuna ahaa nin ixtiraam badan oo dadka aad u soo dhaweysta. Balse maalinta ay dhacadaasi foosha xun dhaceysay mulkiilaha dukaankiisa uu ka maqnaa.
Wiil dhalinyara ah oo dukaanka ka shaqeeya ayaa ka shakiyey 20-ka doolar uu wax kaga iibsaday Floyd kadibna wacay lambarka booliska 911. Sida ay tilmaameyso xogta laga helay diwaanka wicitaanka la duubay ee boolisku keydiyay wiilka yar ayaa booliska u sheegay inuu ka dalbaday Floyd inuu u soo celiya sigaarka, balse Floyd-na uu diiday. Wiilka dukaanka iibinayeyna wuxuu intaa ku daray George Floyd inuu u ekaa qof khamreysan, oo ahaa qof aan xaaladiisa koontarooli karin.
8 daqiiqo marki ay ka soo wareegtay xilliga Booliska la wacay ayey boolisku goobti laga soo wacay soo gaareen. Xilligaasina George Floyd iyo laba qof oo kale ayaa gaari taagan ku wada jiray. Booliska marka ay gaariga ku dhawaadeen waxaa qori la soo baxay askariga lagu magacaabo Thomas Len in George Floyd oo ku amray inuu gaariga ka soo dego, kadibna waxaa dhacday mashaqadii keentay inuu dhinto ninkii.
Gabar dhacdadaasi goob joog u ahayd waxay duubidda dhacdada billaawday George Floyd marka u dhulka ku dhacay isaga oo gacmaha ka xiran. Xogta laga helay xeer ilaaliyaha kiiska gacanata ku haya waxay sheegeysaa ku dhawaad 9 daqiiqo (8 daqiiqo iyo 46 ilbiriisi) askariga inuu Floyd jilibka qoorta kaga hayey.
