Iyadoo uu marxalad cusub galay mooshinka laga keenay Ra’iisal wasaaraha ee horyaala Baarlamaanka, kadib heshiis laga gaaray mooshinka in si caadi ah looga furo Baarlamaanka Talaadada soo socota (AKHRI HESHIISKA LAGA GAARAY MOOSHINKA) ayaa waxaa xowli ku socda dagaalka kala jiidashada xildhibaannada oo lagu loolamayo si koox waliba u heli lahayd codadka ay u baahan tahay.
Wararkii ugu danbeeyay ayaa sheegaya in kooxda taageersan Ra’iisal wasaaraha ay horumar ka gaartay inay naafeyso xildhibaannadii saxiixay mooshinka oo qaar kamida laga reebay mooshinka, qaar kalena laga dhoofinayo magaalada Muqdisho. Qorshahan ayaa ujeedkiisu yahay in lagu yareeyo xildhibaannada codka siin kara mooshinka, wuxuuna mooshinka u baahan yahay 138 cod si xukuumadda kalsoonida loogala noqdo, ra’iisal wasaaruhuna ku dhaco.
Xildhibaannada ka tegaya Muqdisho ayaa sii kordhaya oo qorshahan uu saameynta ku yeeshay, waxayna kooxda Ra’iisal wasaaraha oo u muuqata inay dhaqaale adeegsaneyso ay waqti u heystaan inay dagaalkooda cod u dirirka ah sii wadaan, iyadoo hadba saacad waliba uu sii kordhayo qiimaha uu joogo codka xildhibaanka.
Dhinaca madaxweynaha oo dhibaato weyn u arka dib u dhac kasta oo ku yimaada mooshinka, laakiin aqbalay heshiiska laga gaaray arrintan ayaa wada olole kale oo lagu raadinayo xildhibaanno kale, waxaana rajo weyn soo geliyay dhinaca madaxweynaha xildhibaannada Digil iyo Mirifle qaar kamida oo taageersanaa lixda Gobol, kuwaasoo wadahadal aad u adag kula jiray madaxweynaha.
Mooshinka oo ugu danbeyntii cod lagu kala bixi doono ayaan hadda la saadaalin karin cidda codadka ku filan heysata, waxayn Goobjooge.com isha ku heystaa dhaqdhaqaaqa xildhibaannada iyadoo ay jiraan xildhibaano laba dhinac u diiwaan gashan.
Goobjooge.com
Muqdisho-Somalia
[ad name=”HTML”]
