Kooxo hubeysan ayaa goor dhoweyd rasaas ku furay gaari ay la socdeen  xildhibaanno Soomaaliyeed iyadoo marayay Wadada Maka Al-mukarama. Xildhibaan Cabdalla Boos iyo Yuusuf Maxamed Dirir ayaa la sheegay inay dhaawacyo halis ah ka soo gaareen weerarkaasi.
Wararkii ugu danbeeyay ayaa sheega in Xildhibaan Yuusuf Dirir uu goor dhoweyd u geeriyooday dhaawacii soo gaaray. Waxaana geerida xildhibaanka ka tacsiyadeeyay Guddoomiyaha Baarlamaanka Soomaaliya Maxamed Sheekh Osman Jawaari.
Wararka hordhaca ah ayaa sheegaya in weerarka uu dhacay iyadoo xildhibaannada ay gaari wada saarneeyaan, gaari dabley hubeysan ka buuxaan ayaa lagu hor gooyay gaarigooda kadibna waxaa ooda looga qaaday rasaas, waxaana la yaab lahayd in halka weerarku ka dhacay ay ahayd wadada sida weyn loo ilaaliyo ee dowladdu adeegsato iyadoo dableydu adeegsatay gaari ka mida kuwa gurmadka ah ee dhaawacyada lagu daadgureeyo.
Saaka subaxnimadii ayay ahayd markii fal dil ah lagu khaarijiyay sarkaal ka tirsan wasaaradda gaadiidka Cumar Ubax oo gaari uu la socday weerar lagu qaaday, iyadoo shil kale oo noocan oo kale ah uu ka dhacay degamada Wadajir.
Waxaa sii xoogeysana weerarada ka dhacaya Muqdisho iyadoo hay’adaha nabadgelyada ee dowladda u muuqdaan inay ku adkaatay wax ka qabashada amaandarrada cusub ee ka sii dareysa xilli Bisha Ramadaan ay ku soo fool leedahay dadka caasimadda degan.
Wadani.com
[ad name=”HTML-1″]
[ad name=”HTML-6″]
