Xildhibaan Cabdi Barre Yuusuf oo ka mida xildhibaanada ugu afka dheer Baarlamaanka Soomaaliya ee sida weyn ugu kacsan xukuumadda ayaa amarro la yaab leh soo saaray isagoo ka hadlaya xaalada amniga Muqdisho oo uu ku tilmaamay mid faraha ka baxay oo halis ah.
Xildhibaankan oo dhowaan ka soo laabtay Puntland, horena u sheegay in wax maxkamad ah ka jirin Muqdisho guri uu walaalkii leeyahayna looga heyso ayaa hadda isu bedelay sarkaal amni wuxuuna si toos ah ula hadlay waalidiinta magaalada Muqdisho.
“Waxaan ugu baaqayaa waalidiinta Soomaaliyeed in ay caruurtooda ka ilaaliyaan goobaha dadku isugu yimaaddo, sida; Xeebta Liido, Beerta Nabadda iyo goobaha kale, inta dalka Amnigiisa meel la saarayo” ayuu yiri Xildhibaan Cabdi Barre oo intaas ku daray in saraakiisha ammaanka loo dhiibay aanay aqoon fiican u lahayn howlaha loo xil saaray.
“Shacabka waxaan uga digayaa, carruurahooda galbaha Khamiista iyo Jimcaha u soo dirayaan beerta nasashada xorriyadda oo Xamarweyne ku taalla, waana inay ka joojiyaann caruurtooda meelaha bulshadu isugu tagtana socodka badan ha la joojiyo ha laga digtoonaado, aadna ha looga feejignaado” ayaa ka mid ahaa wareysi uu xildhibaan Cabdi Barre siiyay idaacadaha Muqdisho.
Kadib weeraradii Xeebta Liido dadka Soomaaliyeed waxay qaadeen ololeyaal ay ku caddeynayaan inaysan ka hari doonin tegista Alshabaab, taasoo cinwaan u ahayd olole weyn oo lagu diidan yahay argagax dadka, waxayna dadka Muqdisho ku caan baxeen inaysan shaqadooda u dhigan cabsi qarax.
Waa markii ugu horeysay ee xildhibaan Soomaaliyeed uu sidaa uga hadlo xaalada Muqdisho, iyadoo xildhibaanada uu ka mid yahay Cabdi Barre ay ku nool yihiin Hoteelada Muqdisho oo ah bartilmaameedyada weerarada Alshabaab, wuxuuna baaqani u muuqdaa mid lagu taageerayo rabitaanka Alshabaab.
Wadani.com
