Xildhibaan ka tirsan baarlamaanka Britian oo lagu magacaabo Jo Cox ayaa u dhimatay dhaawac ka soo gaaray weerar Mindi iyo rasaas loo adeegsaday oo lagu qaaday.
Haweeneydan oo ka tirsan Xisbiga Shaqaalaha ee Laborka ayaa da’deedu ahayd 41 sano jir, waxaa laga soo doortaa Waqooyiga Ingiriska, waxaana Booliska ay sheegeen in shilku ka dhacay xarunteeda Yokshire oo ay kulan ku lahayd markii nin hubeysan uu ka tegay isagoo dhowr jeer toorey la dhacay, kadibna toogtay, waxaana sidoo kale weerarkan ku dhaawacmay nin waayeel ah oo 77 sano jir ah.
Ninka falka feystay oo 52 sano jir ah ayaa Boolisku ku qabteen galbeedka Yorkshire. Geerida xildhibaanada ayaa goor dhoweyd ay shaaciyeen booliska.
Guddoomiyaha xisbiga shaqaalaha Jeremy Corbyn ayaa sheegay in dalkiisu ku jiro naxdin weyn oo ka dhalatay geeriyda xildhibaanada.
Waa qofkii ugu horreeyay ee Xildhibaan ah oo xil haya oo la dilay ilaa dilkii xildhibaan Ian Gow, oo lagu dilay weerarkii IRA sanadkii 1990.
