Wadani.net ayaa ogaatay sababtii keentay inuu xilka iska casilo Wasiirkii Gaashaandhigga Xukuumadda Soomaaliya C/rashiid C/llaahi Maxamed oo xilka ka tegay 12-kii Oktoobar 2017.
Is-casilaadda Wasiirka ayaa looga dhawaaqay kulankii Golaha Wasiirada xukuumadda Soomaalia [Akhriso Warkan], iyadoo markaas lagu micneeyay arrimo shaqsi ah oo wasiirka lasoo gudboonaatay.
Baaritaan ay sameystay Wadani.net ayaa caddeynaya in is-casilaadda wasiir C/rashiid uu ka danbeeyay Madaxweyne Maxamed C/llaahi Farmaajo oo ka dalbaday, kuna cadaadiyay inuu is casilo, xilkana ka tago, taasoo ay ugu wacneyd arrimo lagu helay wasiirka.
Xogta ayaa sheegeysa in wasiirkii hore ee Gaashaandhigga uu ku lug yeeshay musuq la xiriira saanad loo soo iibiyay ciidamada milateriga oo kharashaad dheeraad ah uu saartay, iyadoo caddeymo la hordhigay madaxda sare kadib loogu yeeray inuu xilka banneeyo.
Inkastoo wasiirku isku dayay inuu xilka sii joogo haddana madaxweyne Farmaajo ayaa ku adkeystay, taasoo keentay inuu xilka banneeyo, kuna dhawaaqo is-casilaad, wuxuuna wasiirka maalintii uu is casilay kadib kulan la yeeshay qaar ka mida xildhibaanada beesha uu kasoo jeedo.
Is-casilaadda wasiir C/rashiid C/llaahi Maxamed ayaa noqotay mid aan laga sal gaarin xaqiiqdeeda ka hor qormadan iyadoo Taliyihii ciidamada xoogga dalka Jen. Axmed Jimcaale Cirfiid oo isna isla maalintaas istiqaaladiisa lagu dhawaaqay uu madaxweyne Farmaajo ku qancin waayay inuu ka laabto is-casilaada.
Wadani
DEGDEG: Wasiirkii Gaashaandhigga Xukuumadda Soomaaliya oo is casilay
