Waxaa jira caddeymo muujinaya in Ra’iisal wasaare ku xigeenkii xukuumadii u is-casilay Ra’iisal Wasaaraheeda uu isu bedelay una shaqeynayo sida Ra’iisal wasaare buuxa oo rasmi ah. lehna awood fulineed.
Mahadi Maxamed Guuleed waxaa uu horeyn si ka baxsan Dastuurka iyo dhaqanka dowladnimo loogu magacaabay Ku-sime xilka Ra’iisal wasaaraha, sida ku cad wareegto kasoo baxday xafiiska Madaxweyne Farmaajo (Akhriso Warkan), taasoo ka horjeeda Qodobka 103-aad ee Dastuurka KMG ah.
Ra’iisal wasaare ku xigeenka xukuumadiisii kalsoonida ay kala noqdeen Barlamaanka hadii loo eego fekerka Madaxweynaha ama Ra’iisal wasaarihiisii is-casilay wuxuu ka mahad-celiyey, isla markaan aqbalay xilka madaxweynaha u magacaabay (Ka akhri halkan), wuxuuna u howlgalay sida Ra’iisal wasaare rasmi ah.
Mahdi Maxamed Guuleed iyadoo aan daqiiqo kasoo wareegin xilka ku-simenimada ah ee madaxweynaha u magacaabay ayuu isna sameeyay laba tallaabo oo kala ah: magacaabid iyo xil ka qaadis, taasoo aanu sharci ahaan sameyn karin sii-haye xil ama ku-sime. (Akriso)
Dhaqdhaqaaqa Mahdi Guuleed iyo wareegtooyinka uu saxiixayo wuxuu u muuqdaa inuu Madaxweyne Farmaajo ka heysto awood loo siiyey inuu u shaqeeyo sida Ra’iisal wasaare caadi ah, inkastoo aanu lahayn wasiiro cusub, balse ay xukuumadii hore weli xilka sii heyso.
Arrimahan oo dhan waxay muujinayaan sida ay sii yaraaneyso ku-dhaqanka sharciga iyo dastuurka dalka oo Madaxweynihii ay ahayd inuu ilaaliyo uu hormuud ka yahay; waxaana cad in kaliya meesha laga saaray Ra’iisal wasaare Kheyre ee xukuumadii ay sideedii tahay.
