Khudbadii Madaxweyne Maxamed C/llaahi Farmaajo ka jeediyay 18-kii Oktoobar 2017 Garoonka Banadir (Konis Stadium) kadib qarixii weynaa ee ka dhacay Muqdisho waxaa ku dhex jiray saddex qodob oo mudan in la dul istaago.
Khudbadan oo timid kadib saddex maalmood oo baroordiiq ahayd waxaa la wada sugayay qorshaha cusub ee dowladda Federaalka ku wajihi doonto si aysan dib danbe ugu soo laaban wixii dhacay 14-kii Oktoobar oo taariikh madow ku noqotay Soomaalida iyo caalamka.
Qodobadda khudbada ku jira ee iftiiminta u baahan waxay kala ahayeen:
1- DHISMAHA CIIDAMADA DIFAACADA DADWEYNAHA
Madaxweyne Farmaajo ayaa ku dhawaaqay in la dhisayo ciidamo lagu magacaabo: Difaaca Dadweynaha, ciidamadan oo u muuqda kuwo la dagaalamaya Alshabaab, iyadoo madaxweynaha uu sheegaya inuu isaga difaaca jiidda hore tegi doono.
Waxa cusub ayaa ah ciidamo cusub oo u muuqda kuwo Madani ah in madaxweynaha uu sharci ka dhigayo dhismahooda, kuwaasoo ka baxsan Dastuurka, isla markaana aanay muuqan baahi loo qabo ciidamo cusub, iyadoo ciidamada Milateriga ee kala duwan, Booliska, Nabadsugidda, iyo kuwii dhowaan la sameeyay ee xasilinta Caasimadda ay jiraan una baahan yihiin tayeyn, Qalab iyo dhaqaale.
Ciidamadan oo haddii dhinac laga eego la mid noqonaya kuwa laga sameeyay dalka Ciraaq ee lagu Magacaabo “Xashd Ashacbi” (الحَشد الشعبيّ ) oo ah mutadawiciin Shiico ah oo ka barbar dagaalama ciidamada Ciraaq, lana sameeyay markii ay Daacish halista gelisay Ciraaq, ayay muuqataa inaysan sinnaba uga shaqeyn karin xaaladda Soomaaliya.
Waxaa hore u jiray ciidamo madani ah oo qaab xaafadeed iyo beeleed isu abaabuli jiray xilliyada aanay wax dowlad ahi jirin ama magaca uun ka jirtay, laakiin xilligan oo dhisme ciidamo Qaran lagu dhex jiro aan ku habooneyn.
2- MIISAANIYADDA LA-DAGAALANKA ALSHABAAB
Madaxweynaha wuxuu khudbadiisa ku sheegay in lacag dhan 14 Milyan oo doolar dowladdu u qoondeysay la-dagaalanka Alshabaab iyo taageerada dadkii ku waxyeeloobay qaraxii Isgoyska Soope.
Dhaqaalahan inkastoo aanu caddeyn halka uu ka imaanayo iyo sida loo qorsheeyay, haddana dowladda Federaalka waxay u baahan tahay oo kaliya inay maareyso dhaqaalaha badan ee Sooamaalida iyo beesha caalamka ku deeqayaan, si aan dhexda looga bixin, isla markaana ay dhismaha ciidamadeeda ka dhigto mashruuc gaara oo ah mid qaran oo aan ku xirneyn xaalad mar soo dhac ah.
3- BAAQA IN SHACABKU HUB QAATO
Madaxweynaha Farmaajo wuxuu shacabka ugu baaqay inay hubka qaataan, taasoo ahayd baaq kicin ah oo dadka lagu xamaasad gelinayo, haddiise si qoto dheer loo eego noqonaya mid halis ku ah dhinaca ammaanka.
Dowladda Federaalka oo leh ciidamo ka badan 50,000 askari oo milateri, Boolis iyo Nabadsugid isugu jira uma baahna shacab dagaalama, iyadoo xaaladda Soomaaliya ay tahay mid dadku qabiil u qeybsan yahay, waxaana la rajeynayaa inuu baaqu ku koobnaado garoonkii laga sheegay oo loo qaato xamaasad iyo kicin dadweyne kaliya.
FAAQIDAADDA GOOBJOOGE
