Hay’adda Culimadda Soomaaliyeed ayaa war kasoo saartay xaalada amniga, siyaasadda iyo xiriirka dowladda Federaalka iyo dowlad goboleedyadda.
Hay’adda Culimadda Soomaaliyeed ayaa soo saartay dhowr qodob oo ku saabsan Xaaladda dalka, waxaan shir jaraa’id oo ay ku qabteen Muqdisho ay si weyn ugu dhaliileen dowladda Federaalka inay ka gaabisay arrimaha Amiga.
Qodobadda shirka jaraa’id waxaa ka mida:
1:- Dhammaan Mas’uuliyiinta dalka,sida Dowladda Federaalka iyo Dowlad Goboleedyada, waxaa waajib ku ah in ay ku dhaqmaan waxa alle uu faray oo ah inay sameeyaan wadatashi ku saabsan samatabixinta dadka Soomaaliyeed iyo in ay sidegan wax isku-dhaafsadaan.
2:- Waa inay fuliyaan kana dhabeyaan dhaartii ay ku dhaarteen inay u Shaqeeyaan,Diintooda Dalkooda,dadkooda oo ay dadka hortooda ka balan qaadeen.
3:- Waxaa Waajib ku ah dowladda uu hoggaamiyo Madaxweyne Farmaajo in ay dadaal dheeri ah ku bixiso mideynta dhinacyada Siyaasadeed ee dalka ka jira, sida xukuumadda iyo Dowlad goboleedyada.
Sheekh Nuur Baaruud oo ka mid ah Hay’adda Culimadda Soomaaliyeed ayaa soo jeediyay in Al-shabaab laga saaro labada Shabeelle si amaanka Muqdisho loo sugo, wuxuuna sheegay in iyadoo ay Alshabaab ku sugan yihiin labada Gobol ee Shabeelooyinka aysan suuragal ahayn in amniga caasimadda la sugo, wuxuuna si cad u sheegay uu sheegay inay dowladda Cambaareyn ku muteysan karto xaaladda amniga.
Dowladda Federaalka ah ayuu sheegay in lagula xisaabtamayo dhibaatada haysata shacabka isaga oo xusay in aysan cudur daar u heleyn in maalin kasta shacabka Soomaaliyeed la laayo.
Sheekh Nuur Baaruud ayaa degmada Beledxaawo ku bogaadiyey inay iska saarayaan xaasaska iyo caruurta Alshabaab, wuxuuna intaas ku daray in magaalada Kismaayo ay xaaladeeda soo hagaagtay markii ay iska saareen xaasaska Alshabaab. Wuxuuna ku baaqay in sidaas oo kale la yeelo magaalada Muqdisho.
